ٹرمپ کے ’بھونکنے‘ سے کوئی فرق نہیں پڑے گا، شمالی کوریا

شمالی کوریا :امریکی صدر ڈونلڈ ٹرمپ کی شمالی کوریا کو صفحہ ہستی سے مٹانے کی دھمکی کے بعد پیونگ یانگ کی جانب سے سخت رد عمل سامنے آیا ہے۔ اس کمیونسٹ ریاست نے ٹرمپ کے بیان کو ’’کتے کے بھونکنے‘‘ سے تعبیر کیا ہے۔شمالی کوریا کے وزیر خارجہ ری یونگ ہْو نے امریکی صدر ڈونلڈ ٹرمپ کی جانب سے اس کمیونسٹ ریاست کو عسکری کارروائی کے ذریعے مکمل طور پر تباہ کر دینے کی دھمکی کے بارے میں کہا ہے کہ یہ ’’کتے کے بھونکنے جیسا‘‘ ہے۔ یونگ ہْو کے بقول، ’’اگر وہ یہ سوچتے ہیں کہ وہ اپنے اس بھونکنے سے ہمیں خوف زدہ کر دیں گے تو یہ واقعی کسی کتے کا خواب ہو سکتا ہے۔‘‘شمالی کوریائی وزیر خارجہ نے یہ بیان نیو یارک میں دیا، جہاں وہ اقوام متحدہ کی جنرل اسمبلی کے اجلاس میں شرکت کے لیے پہنچے ہیں۔ ٹرمپ نے منگل 19 ستمبر کو جنرل اسمبلی سے اپنے خطاب میں شمالی کوریائی رہنما کم یونگ اْن کو ’راکٹ مین‘ کہا تھا۔