ہندوستان کا کووڈ 19 کی تجرباتی ویکسین 15 اگست کو متعارف کرانے کا اعلان—- ترکی: کیا آیا صوفیہ دوبارہ مسجد میں تبدیل ہو جائے گا؟

ہندوستان ،چین سرحدی تنازع: نریندر مودی کا لداخ میں اگلے مورچوں کا دورہ

آمنا سامنا میڈیا : عالمی خبریں :

03.07.2020

نامہ نگار : محمد سمیع اللہ شیخ

 

ہندوستان کا کووڈ 19 کی تجرباتی ویکسین 15 اگست کو متعارف کرانے کا اعلان

 

ہندوستان کے طبی ادارے انڈین کونسل آف میڈیکل ریسرچ (آئی سی ایم آر) کا کہنا ہے کہ ہندوستان میں تیار کردہ کرونا وائرس کی پہلی ویکسین رواں سال 15 اگست تک متعارف کرائی جاسکتی ہے۔

‘آئی سی ایم آر’ کے مطابق ‘کو ویکسین’ نامی ویکسین کا جانوروں پر تجربہ کامیاب رہا اور اس کے انسانوں پر تجربے کے لیے ایک درجن اداروں کو منتخب کیا گیا ہے۔ آئی سی ایم آر کا مزید کہنا ہے کہ اس سلسلے میں ‘بھارت بائیوٹیک انٹرنیشنل لمیٹڈ’ کے ساتھ مل کر کوششیں تیز کردی گئی ہیں۔ تاہم اس ویکسین کے تجربے کا حتمی نتیجہ تجربے کے لیے منتخب کردہ اداروں کے تعاون پر منحصر ہے۔ طبی ادارے کے مطابق مذکورہ اداروں سے کہا گیا ہے کہ وہ اس سلسلے میں ترجیحی بنیاد پر اپنی کارروائیاں تیز کردیں۔ خیال رہے کہ دنیا کے کئی ملک کرونا وائرس ویکیسن تیار کر رہے ہیں۔ تاہم ماہرین کا کہنا ہے کہ اس سال کے آخر تک اس وبا سے بچاؤ کے لیے مستند ویکسین تیار کر لی جائے گی ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

بالی وڈ اسٹارز کو ‘نچانے’ والی سروج خان چل بسیں۔

 

بالی وڈ انڈسٹری کی معروف کوریوگرافر سروج خان 71 سال کی عمر میں انتقال کر گئیں۔

انہیں دل کا عارضہ تھا جس کے سبب وہ 20 جون سے ممبئی کے ایک اسپتال میں داخل تھیں تاہم دوران علاج ہی جمعے کی صبح حرکت قلب بند ہونے سے اُن کی موت واقع ہو گئی۔ بھارتی میڈیا رپورٹس کے مطابق کوریوگرافی میں مہارت رکھنے کے باعث انہیں ‘کوریوگرافی کوئن’ کہا جاتا تھا۔ 80 اور 90 کی دہائی میں گانوں کی کوریوگرافی یعنی رقص میں جو تازگی نظر آتی ہے، اس کا تمام سہرا سروج خان کے سر ہے ۔

سروج خان 20 نومبر 1948 کو ممبئی میں پیدا ہوئیں۔ ان کا پیدائشی نام نرمالا ناگ پال تھا۔ انہوں نے تین سال کی عمر میں فلم ‘نذرانہ’ میں اداکاری سے بطور چائلڈ اسٹار فنی کریئر کا آغاز کیا۔ ستر کی دہائی میں انہوں نے کوریوگرافی کا آغاز کیا لیکن ان کی اصل وجہ شہرت 80 کی دہائی میں سری دیوی اور مادھوری ڈکشٹ کے وہ ڈانس نمبرز تھے جو آج بھی لوگوں کو یاد ہیں۔ انہوں نے چار دہائیوں پر مشتمل کریئر کے دوران دو ہزار سے زائد گانوں کی کوریوگرافی کی۔ فلم ‘مسٹر انڈیا’ کا گانا ‘ہوا ہوائی’ ہو یا فلم ‘تیزاب ‘کا ‘ایک دو تین’ یا پھر شاہ رخ خان کی فلم ‘دیوداس’ کا ‘دل ڈولا رے ڈولا’ ہو سروج خان نے ہر گانے کو اپنی کوریوگرافی سے اسے نیا روپ دیا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

ہندوستان ،چین سرحدی تنازع: نریندر مودی کا لداخ میں اگلے مورچوں کا دورہ

 

بھارت کے وزیرِ اعظم نریندر مودی نے چین کے ساتھ سرحدی تنازع کے بعد لداخ کا دورہ کیا ہے جہاں اُنہیں بھارتی فوج کی جانب سے علاقے کی تازہ ترین صورتِ حال پر بریفنگ دی گئی ہے۔

خبر رساں ادارے ‘رائٹرز’ کے مطابق ہندوستان کے چیف آف جنرل اسٹاف جنرل بپن راوت اور آرمی چیف منوج موکنڈ نراوانے بھی جمعے کو لداخ کے دورے کے موقع پر بھارتی وزیرِ اعظم کے ہمراہ تھے۔ ذرائع ابلاغ کے مطابق وزیرِ اعظم مودی نے لداخ میں ‘نمو’ کے مقام پر اگلے مورچوں پر فوجیوں سے خطاب بھی کیا۔ ہندوستان کے وزیرِ اعظم نریندر مودی نے خبردار کیا کہ اُن کے ملک کے خلاف توسیع پسندانہ عزائم کو پوری قوت کے ساتھ خاک میں ملایا جائے گا۔ انہوں نے چین کا نام لیے بغیر کہا کہ اگر لداخ کے کسی بھی حصے پر قبضہ جمانے کی کوشش کی جاتی ہے تو بھارتی مسلح افواج اسے اپنی پوری قوت کا استعمال کرتے ہوئے ناکام بنائے گی۔ اُنہوں نے کہا کہ توسیع پسندی کا زمانہ گزر چکا ہے۔ یہ ترقی کا دور ہے۔ تاریخ اس بات کی گواہ ہے کہ توسیع پسند افواج یا تو شکست سے دوچار ہوئی ہیں یا انہیں پیچھے ہٹنے پر مجبور ہو جاتی ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

ترکی: کیا آیا صوفیہ دوبارہ مسجد میں تبدیل ہو جائے گا؟

 

ترکی کی اعلٰی ترین عدالت نے تاریخی یاد گار آیا صوفیہ کو مسجد میں تبدیل کیے جانے سے متعلق فیصلہ 15 دن کے لیے مؤخر کردیا ہے۔

ترکی کی ‘کاؤنسل آف اسٹیٹ’ نے کہا ہے کہ عدالت 1500 سال پرانے تاریخی مقام آیا صوفیہ میوزیم کو مسجد میں تبدیل کرنے سے متعلق فیصلہ اب 15 دن بعد سنائے گی۔ سیکولر جماعتوں اور بین الاقوامی برادری کی مخالفت کے باوجود قدامت پسند ترک رہنما آیا صوفیہ کو میوزیم سے مسجد میں تبدیل کرنے کا مطالبہ کر رہے ہیں۔ اس مطالبے پر گزشتہ سال ترکی میں ہونے والے انتخابات سے قبل صدر رجب طیب ایردوان نے آیا صوفیہ کو مسجد میں تبدیل کرنے کا وعدہ بھی کیا تھا۔ تجزیہ کاروں کا خیال ہے کہ اگر اس تاریخی ورثے کو مسجد میں تبدیل کیا گیا تو ترکی کے امریکہ اور یونان سمیت مغربی ملکوں کے ساتھ تعلقات خراب ہوسکتے ہیں۔ حال ہی میں یونان کی وزیر برائے ثقافت لینا مینڈونی کی طرف سے ترکی پر قدامت پسندوں کے مذہبی جذبات بھڑکانے کا الزام لگایا گیا تھا۔

اُدھر عالمی ثقافتی ورثے کی دیکھ بھال سے متعلق اقوامِ متحدہ کے ادارے ‘یونیسکو’ کا کہنا ہے کہ کوئی فیصلہ کرنے سے قبل تمام فریقوں کی رضا مندی حاصل کی جائے۔ امریکی وزیر خارجہ مائیک پومپیو نے بھی بدھ کو ایک ٹوئٹ میں ترک حکومت سے مطالبہ کیا تھا کہ وہ چاہتے ہیں کہ ترکی آیا صوفیہ کو میوزیم ہی رہنے دے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

غرب اردن میں عوامی استقامت کو فعال کئے جانے پر فتح کی تاکید

 

غاصب صیہونی حکومت کے غاصبانہ منصوبے کے خلاف سبھی فلسطینی تنظیموں نے متحد ہو کے مجاہدت کی ضرورت پر زور دیا ہے جن میں وہ فلسطینی گروہ بھی شامل ہیں جو سازباز کے عمل کے حامی رہے ہیں۔ دوسری طرف غاصب صیہونی حکومت کے ساتھ بعض عرب حکومتوں کے تعاون میں توسیع کی خبریں مل رہی ہیں۔ الاقصی بریگیڈ کے کمانڈر ابوسیف نے غرب اردن کے بعض علاقوں کو قبضانے کے لئے غاصب صیہونی حکومت کے منصوبے کا ہر طرح سے مقابلہ کئے جانے کی ضرورت پر زور دیا ہے۔الاقصی بریگیڈ کے کمانڈر نے الرسالہ ویب سائٹ سے گفتگو میں کہا ہے کہ غاصب صیہونی حکومت صرف طاقت کی زبان سمجھتی ہے۔انھوں نے غاصب صیہونی حکومت کے مقابلے میں ہر طرح سے استقامت کا مظاہرہ کئے جانے کی ضرورت پر زور دیا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

سعودی عرب کے فوجی اور سرکاری اہداف پر حملوں کا اعلان

 

یمن کی مسلح افواج نے سعودی اتحاد کے فوجی ٹھکانوں اور سرکاری اہداف کو نشانہ بنانے کا اعلان کیا ہے۔ المسیرہ ٹیلی ویژن کے مطابق یمن کی مسلح افواج کے ترجمان یحی السریع نے کہا کہ جب تک یمن کے خلاف جنگ بند اور محاصرہ ختم نہیں ہوجاتا اس وقت تک سعودی اتحاد کے فوجی اور سرکاری اداروں پر حملے جاری رہیں گے۔ انہوں نے کہا کہ یمن کی فوج اور عوامی رضاکار فورس کے جوانوں کو اپنے وطن اور عوام کے دفاع کا قانونی حق حاصل ہے۔ یمن کی مسلح افواج کے ترجمان نے کہا کہ ہماری دفاعی طاقت میں پہلے سے زیادہ اضافہ ہوا ہے، اگرچہ ہم نے اب تک اپنی پوری حربی توانائی سے کام نہیں لیا ہے۔ انہوں نے کہا کہ دشمن ہماری دفاعی طاقت کو سمجھ لے اور یمن پر جارحیت بند اور محاصرہ ختم کردے۔

دوسری جانب یمن کی وزارت انسانی حقوق نے کہا ہے کہ سعودی حکومت کے لڑاکا طیاروں نے ایک بار پھر صنعا اور صعدہ صوبوں میں طاقتور کلسٹر بموں کا استعمال کیا ہے۔ یمن کی وزارت انسانی حقوق کے مطابق صوبہ صعدہ پر سعودی جنگی اتحاد کی بمباری میں ایک کم سن لڑکی اور سن رسیدہ خاتون شہید ہوگئی۔ اس رپورٹ کے مطابق سعودی جنگی طیاروں نے صنعا کے شہر سبعین میں ایک اسپتال کے گودام کو نشانہ بنایا ہے جس کے نتیجے میں وہاں موجود طبی وسائل اور دواؤں کا ذخیرہ تباہ ہوگیا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

عراق میں داعش کی سرنگونی میں امریکہ کا کوئی کردار نہیں: نوری المالکی

 

عراق کے سابق وزیر اعظم نے کہا ہے کہ دہشتگرد گروہ داعش کے خلاف جنگ میں امریکہ نے عراق کی کوئی عسکری مدد نہیں کی۔

المعلومہ نیوز کی رپورٹ کے مطابق عراق کے سابق وزیر اعظم نوری المالکی نے کہا ہے کہ عراقی فورسز کی داعش دہشت گرد گروہ پر فتح میں امریکہ کا کوئی کردار نہیں ہے ۔ عراق کے سابق وزیر اعظم کا کہنا تھا کہ امریکہ نے حتی عراقی فورسز کو ہتھیار نہیں دیئے لیکن ایران اور روس نے بغداد کیلئے اپنے ہتھیاروں کے گوداموں کے دروازے کھول دیئے۔ عراق کے سابق وزیر اعظم نے کہا کہ موصل پر داعش کے قبضہ میں عراقی فوج کے بعض عناصر ملوث تھے۔ عراق میں داعش کی شکست کے باوجود اس دہشت گرد گروہ کے باقی بچے عناصر مختلف علاقوں میں روپوش ہیں اور وہ گاہے بگاہے عراقی عوام اور سیکورٹی اہلکاروں کو اپنے حملوں کا نشانہ بناتے رہتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

ترکی کے کمانڈوز شام پہنچ گئے

 

ترکی نے شام کے علاقے راس العین کے لئے اپنے مزید 268 فوجی روانہ کئے۔

ترکی کی ٹی آر ٹی انٹرنیٹ کی رپورٹ کے مطابق ترکی کی وزارت دفاع کا کہنا ہے کہ کل ترکی کی فوج کے 268 کمانڈوز شام کے صوبے الحسکہ کے علاقے راس العین میں تعینات ہونے کے لئے کل ترکی کے شہر سیلوان سے روانہ ہوئے۔

واضح رہے کہ ترکی تین برسوں سے شامی حکومت کی اجازت کے بغیر اس ملک میں موجود ہے اور دہشت گردوں سے مقابلے کے بہانے ترکی کی فوج نے شام کے کچھ علاقوں پر قبضہ کر لیا ہے جہاں پر یہ فوجی اب بھی موجود ہیں جس پر اسے عالمی سطح پرتنقید کا سامنا کرنا پڑ رہا ہے۔ ترکی، شام میں سرگرم کئی دہشت گرد گروہوں کی حمایت کرتا ہے۔ شام کا بحران دوہزار گیارہ میں اُس وقت شروع ہوا جب ترکی، سعودی عرب، امریکہ اور اس کے اتحادیوں کے حمایت یافتہ دہشتگردوں نے خطے کے موجودہ حالات کا رخ صیہونی ٹولے کے حق میں موڑنے کے لئے شام پر چڑھائی کی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

امریکہ میں کورونا کے بڑھتے قہر پر اس ملک کے حکام کی تشویش ۔

 

امریکہ میں متعدی بیماریوں اور الرجی کے نیشنل انسٹیٹیوٹ کے سربراہ نے امریکہ میں کورونا کے بڑھتے قہر پر خبردار کیا ہے۔

امریکہ میں الرجی اور متعدی بیماریوں  کے نیشنل انسٹیٹیوٹ کے سربراہ اینٹونیو فاؤچی نے بی بی سی سے گفتگو میں امریکہ میں گذشتہ چوبیس گھنٹے کے دوان پچاس ہزار سے زائد لوگوں کے کورونا وائرس میں مبتلا ہونے پر خبردار کرتے ہوئے اس صورتحال  کو خطرناک قرار دیا۔ انھوں نے کہا کہ امریکہ تاریخ کے خطرناک ترین دور سے گزر رہا ہے جو خود امریکہ کے لئے خوش آئند نہیں ہے۔فاؤچی نے کہا کہ جس طرح سے امریکہ میں کورونا وائرس میں مبتلا ہونے والوں کی تعداد تیزی سے بڑھتی جا رہی ہے اس کے پیش نظر مستقبل قریب میں روزانہ ایک لاکھ افراد کورونا سے متاثر ہو سکتے ہیں۔

قابل ذکر ہے کہ عالمی سطح پر امریکہ میں کورونا کے سب سے زیادہ زور کا مشاہدہ کیا گیا ہے جس کی وجہ اس ملک کے حکام کی لاپرواہی اور اس وبا کو کنٹرول کرنے کی عدم صلاحیت قرار دیا جاتا ہے۔ امریکہ میں کورونا کے نتیجے میں ہونے والی اتنی ہلاکتوں پر اس ملک کے صدر ٹرمپ کو شدید تنقید کا بھی نشانہ بنایا جا رہا ہے۔ امریکہ میں اب تک اٹھائیس لاکھ سینتیس ہزار ایک سو نواسی افراد کورونا وائرس میں مبتلا ہو چکے ہیں جن میں سے اب تک ایک لاکھ اکتیس ہزار چار سو پچاسی افراد ہلاک ہو چکے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

پاکستان میں وین ٹرین سے ٹکراگئی، 19 افراد ہلاک ۔

 

پاکستان میں مسافر ٹرین اور وین کے درمیان تصادم کے نتیجے میں انیس افراد مارے گئے۔

 پاکستان ریلوے کے ترجمان کے مطابق یہ حادثہ شیخوپورہ میں دوپہر ایک بجے اس وقت پیش آیا جب سکھ یاتریوں سے بھری ایک وین فاروق آباد اور بحالی کے درمیان ریلوے کراسنگ پر ایک مسافر ٹرین سے ٹکراگئی۔ کہا جارہا ہے کہ مذکورہ ریلوے کراسنگ پر کوئی گیٹ نصب نہیں تھا۔ بتایا جاتا ہے کہ وین میں پچیس سکھ یاتری سوار تھے جن میں سے انیس کی موت واقع ہوگئی جبکہ باقی کو استپال میں داخل کرادیا گیا ہے۔