ہندوستان چین کشیدگی کے بیچ بندرگاہوں پر چینی اشیا پھنسی ہیں مگر نقصان کس کا ہے؟

آمنا سامنا میڈیا عالمی خبریں
1/7/2020
نامہ نگار : محمد سمیع اللہ شیخ

روس میں آئینی اصلاحات پر ووٹنگ کا آخری دن ۔

صدر ولادمیر پوٹن کی حکومت کی طرف سے تجویر کردہ وسیع تر آئینی اصلاحات کی منظوری کے لیے آج
ووٹنگ کا آخری دن ہے۔ کورونا وبا کے باعث اور سماجی فاصلے کی ضرورت کے پیش نظر ملک میں رائے دہی
کے اس عمل کو سات دن جاری رکھا گیا۔ مجوزہ آئینی ترامیم کو صدر پوٹن کے اقتدار کو طول دینے کی کوشش
کے طور پر دیکھا جا رہا ہے۔ ان ترامیم کی حتمی منظوری کے بعد صدر پوٹن کے لیے مزید سولہ برس اقتدار میں
رہنے کی راہ ہموار ہوجائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹرمپ نے جرمنی سے ساڑھے نو ہزار فوجی نکالنے کا حکم دے دیا ہے ۔

امریکی صدر ڈونلڈ ٹرمپ نے جرمنی سے ساڑھے نو ہزار امریکی فوجی نکالنے کے حکم نامے پر دستخط کر دیے
ہیں۔ انہوں نے اس بارے میں دو ہفتے پہلے ہی اعلان کیا تھا۔ امریکی صدر کو جرمنی سے شکایت ہے کہ وہ نیٹو
افواج کا اتنا خرچہ نہیں اٹھا رہا جتنا ان کے بقول اس اٹھانا چاہییے۔ امریکی محکمہ دفاع پیٹاگون نے کہا کہ امریکا
کے اس فیصلے سے روس کے مد مقابل نیٹو کو مؤثر بنانے میں مدد ملے گی، تاہم حکام نے یہ واضح نہیں کیا کہ
جرمنی سے نکالے جانے والے فوجی یورپ میں کہاں تعینات کیے جائیں گے۔ جرمنی میں اس وقت امریکا کے
ساڑھے چونتیس ہزار فوجی تعینات ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غرب اردن کے الحاق میں کچھ وقت لگے گا، اسرائیل

اسرائیلی وزیر خارجہ نے کہا ہے کہ غرب اردن کو اسرائیل کے ساتھ ملانے کے مجوزہ اقدام پر بدھ کو عمل ہونا
مشکل دکھائی دیتا ہے۔ اسرائیلی وزیراعظم بنجمن نیتن یاہو نے پہلے کہا تھا کہ وہ غرب اردن سے متعلق اپنے اس
متنازعہ پلان کو پہلی جولائی سے نافذ کریں گے۔ تاہم اطلاعات ہیں کہ انہیں حکومت میں شامل اپنی حلیف جماعتوں
سے سخت تحفظات کا سامنا ہے جس کے باعث اس میں کچھ وقت لگ سکتا ہے۔ اسرائیل کی طرف سے اس اقدام کی
اقوام متحدہ، یورپی یونین اور عرب ممالک سخت مذمت کر چکے ہیں تاہم بنجمن نیتن یاہوکو یک طرفہ الحاق کے
اس منصوبے میں امریکی صدر ٹرمپ کی بھرپور حمایت حاصل ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تہران کے کلینک میں دھماکے سے 19 ہلاک

ایران کے دارالحکومت تہران کے ایک کلینک میں ہونے والے دھماکے کے نتیجے میں کم از کم 19 لوگ ہلاک
ہوگئے ہیں۔ سوشل میڈیا پر پوسٹ کی گئی ویڈیوز میں اس واقعے کی جگہ سے دھویں کے گہرے بادل اٹھتے
دیکھے جا سکتے ہیں۔ دھماکہ اتنا زور دار تھا کہ آس پاس کی عمارتوں کو بھی نقصان پہنچا۔ سرکاری میڈیا کے
مطابق مرنے والوں میں چار مرد اور 15 خواتین شامل ہیں۔ ایرانی حکام نے کہا ہے کہ یہ واقعہ میڈیکل گیس ٹینک
میں لیک کے باعث پیش آیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پاکستان کی پہلی خاتون لیفٹیننٹ جنرل نگار جوہر: جنہیں مختلف زاویوں سے
دیکھا جارہا ہے ۔

پاکستانی فوج میں پہلی بار لیفٹیننٹ جنرل کے عہدے پر ایک خاتون کی تقرری کا اعلان کیا گیا ہے۔ ڈاکٹر نگار جوہر
فوج میں میجر جنرل کے عہدے سے ترقی پا کر لیفٹیننٹ جنرل کے عہدے پر پہنچنے والی پہلی خاتون ہیں۔ ان کی
اس تقرری کے بعد مختلف حلقوں میں اس بارے میں متضاد خیالات کا اظہار کیا جا رہا ہے۔
ڈاکٹر نگار جوہر گرچہ پاکستان کی متعدد خواتین کے لیے باعث فخر شخصیت ہیں تاہم ان کی بطور لیفٹیننٹ جنرل
تقرری کے بعد سے اس فیصلے کو مختلف زاویوں سے دیکھا جا رہا ہے۔ ڈاکٹر نگار جوہر کا تعلق خیبر پختونخواہ
میں صوابی کے علاقے پنج پیر سے ہے۔ ان کا تعلق اس علاقے کے معروف مذہبی گھرانے سے ہے۔ اس بارے میں
پاکستانی میڈیا اور سوشل میڈیا پر بحث بھی ہو رہی ہے کہ کیا ڈاکٹر نگار کی اس اعلیٰ عہدے پر تقرری کے پیچھے
ان کے پس منظر کا ہاتھ ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چین کی ایغور مسلم آبادی میں اضافے کے خلاف سخت حکومتی اقدامات

چینی حکومت ایغور مسلمانوں اور دیگر اقلیتوں کے ہاں بچوں کی پیدائش کی شرح پر کنٹرول کے لیے بہت سخت
اقدامات کر رہی ہے۔ جب کہ دوسری طرف ہان نسل کی اکثریتی آبادی کو زیادہ بچے پیدا کرنے کی ترغیب دی جا
رہی ہے۔ چینی حکومت ایغور مسلمانوں اور دیگر اقلیتوں کے ہاں بچوں کی پیدائش کی شرح پر کنٹرول کے لیے
بہت سخت اقدامات کر رہی ہے۔ دوسری طرف ہان نسل کی اکثریتی آبادی کو زیادہ بچے پیدا کرنے کی ترغیب دی
جا رہی ہے۔
متعدد خواتین انفرادی طور پر جبری فیملی پلاننگ کے بارے میں اپنے خیالات اور تجربات کا اظہار کرتی آئی ہیں
تاہم خبر رساں ادارے ایسو سی ایٹڈ پریس نے اس بارے میں چھان بین کی۔ یہ چھان بین حکومتی اعداد و شمار،
سرکاری دستاویزات اور ماضی میں چین میں زیر حراست رہنے والے 30 افراد، ان کے اہل خانہ اور حراستی کیمپ
کے ایک سابق انسٹرکٹر سے ملنے والی اطلاعات کو بروئے کار لاتے ہوئے مکمل کی گئی۔
چین میں خاندانی منصوبہ بندی کا پابند بنانے کے لیے شہریوں کو حراستی کیمپوں میں ڈال دینے کے خطرات سے
ڈرایا جاتا ہے اور فیملی پلاننگ کے اصولوں کی خلاف ورزی یا ان کے احترام میں ناکامی کی سزا کے طور پر
انہیں کیمپوں میں زیر حراست بھی رکھا جاتا ہے۔ نیوز ایجنسی اے پی کے مطابق تین یا اس سے زیادہ بچوں کے
والدین کو ان کی فیملی سے دور کر کے سزا کے طور پر اس وقت تک کے لیے کسی نہ کسی حراستی کیمپ میں
پہنچا دیا جاتا ہے، جب تک کہ وہ جرمانے کی بھاری رقم ادا نہ کریں۔ یہاں تک کہ پولیس ان کے گھروں پر چھاپے
بھی مارتی ہے کہ وہاں کوئی بچے چھپے ہوئے نہ ہوں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مفت اناج دے کر بھارت نے دنیا کو حیرت زدہ کر دیا: مودی

بھارتی وزیر اعظم نریندر مودی نے کہا کہ کورونا وائرس کی وجہ سے لاک ڈاون کے دوران ملک کے اسی کروڑ
سے زیادہ لوگوں کو پچھلے تین ماہ سے مفت راشن کی مسلسل فراہمی نے دنیا کو حیرت زدہ کر دیا ہے۔
کورونا وائرس کی وبا پھیلنے کے بعد قوم کے نام منگل  تیس جون کو اپنے چھٹے خطاب میں وزیر اعظم مودی نے
کہا کہ پچھلے تین ماہ کے دوران غریب خاندان کے ہر فرد کو ماہانہ پانچ کلو چاول یا آٹا اور ہر خاندان کو ایک کلو
دال مفت فراہم کی گئی۔ وزیر اعظم مودی نے کہا کہ دنیا بھارت کے اس اقدام سے حیرت زدہ ہے، ”بھارت نے
امریکا کی مجموعی آبادی سے ڈھائی گنا زیادہ لوگوں کو، برطانیہ کی آبادی سے بارہ گنا زیادہ لوگوں کو اور یورپی
یونین کی آبادی سے دو گنا زیادہ لوگوں کو مفت اناج دیا۔“
انہوں نے اعلان کیا کہ مفت اناج دینے کا یہ سلسلہ نومبر تک جاری رہے گا، ”اس پر نوے ہزار کروڑ روپے سے
زیادہ خرچ ہوں گے اور اگر پچھلے تین ماہ کا خرچ بھی شامل کر لیا جائے تو یہ تقریباً ڈیڑھ لاکھ کروڑ روپے بنتے
ہیں۔“
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہندوستان چین کشیدگی کے بیچ بندرگاہوں پر چینی اشیا پھنسی ہیں مگر نقصان کس کا ہے؟

ساری دنیا اس وقت کورونا وائرس کی وبا سے بری طرح متاثر ہے۔ ہندوستان میں بھی متاثرین کی تعداد میں
زبردست اضافہ سامنے آ رہا ہے۔ کورونا وائرس کے خلاف اب تک کوئی مؤثر دوا تو نہیں بنائی جا سکی ہے لیکن
اس کے علاج یا علامات کا پتا لگانے میں تین چیزوں کا اہم کردار ہے: وینٹیلیٹر مشین، انفراریڈ تھرما میٹر اور
آکسیمیٹر۔ ویسے تو یہ تینوں ہی طبی آلات ہندوستان میں بنائے جاتے ہیں لیکن انھیں بنانے کے لیے چھوٹے چھوٹے
پرزوں کی بڑی تعداد چین سے امپورٹ کی تی ہے۔ یہی وجہ ہے کہ اس وقت ہندوستان میں میڈیکل آلات امپورٹ
کرنے والی کمپنیوں کے علاوہ طبی کارکنان اور عوام کے ذہن میں بھی یہ سوال ہے کہ ہندوستان اور چین کے
درمیان جاری کشیدگی کے سبب کہیں ان اشیا کی قلت کا سامنا تو نہیں کرنا پڑے گا؟
چین سے درآمد ہونے والی ادویات پر ہندوستان کا انحصار تو ہے ہی، اس کے علاوہ میڈیکل آلات کا بھی بڑھتے
ہوئے میڈیکل ٹورزم اور طبی سہولیات میں بڑا ہاتھ ہے۔ سرکاری اعداد و شمار کے مطابق 2019 اور 2020 کے
درمیان ہندوستان نے چین سے 1,150 کروڑ رویے کی فارما سے منسلک اشیا امپورٹ کی تھیں جن میں ادویات
بنانے کے خام مال کے علاوہ میڈیکل آلات بھی شامل تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پوری دنیا میں کوویڈ 19 متاثرین کی تعداد 1 کروڑ سے بھی تجاوز کر گئی ۔

۔ جبکہ پوری دنیا اس سے ہلاکتیں 5 لاکھ 14 ہزار 21 ہو گئیں۔  کوویڈ 19 سے متاثرہ افراد کی تعداد 1 کروڑ 5
لاکھ 90 ہزار 953 تک جا پہنچی۔ اور دنیا بھر میں 42 لاکھ 78 ہزار 662 مریض ہسپتالوں ، قرنطینہ مراکز میں
زیرعلاج اور گھروں میں آئسولیشن میں ہیں، جن میں سے 57 ہزار 840 کی حالت تشویش ناک ہے جبکہ 57 لاکھ
98 ہزار 270 مریض صحت یاب ہو چکے ہیں۔