انتخابات میں کانگریس کی اچھی کارکردگی کے لئے عوام اور کانگریس کارکنان آج کی جیت کے حقدار ہیں , راہل گاندھی

صحافیوں سے خطاب کرتے ہوئے راہل نے اپنی والدہ سے ایک روز پہلے ہوئی بات چیت کا ذکر کرتے ہوئے کہا کہ ’’میں کل والدہ سے کہہ رہا تھا کہ میرے لئے سال 2014 کے انتخابات بہت اہم رہے کیونکہ میں نے انتخابات سے انکساری سیکھی اور مودی سے میں نے بہت سیکھا ۔ میں نے ان سے سیکھا کہ مجھے کیا نہیں کرنا چاہیے ‘‘۔ راہل گاندھی نے کہا کہ مودی کے لئے بہت اچھا موقع تھا لیکن وہ اس میں ناکام رہے اور انہوں نے عوام کے دلوں کی دھڑکنیں نہیں سنی ۔ راہل نے کہا کہ’’ کانگریس کارکنان جن کو میں ببر شیر مانتا ہوں ان کو اب اپنی ذمہ داری سمجھنی ہوگی اور عوام کے لئے کام کرنا ہوگا‘‘۔ انہوں نے کہا نوٹ بندی ایک بڑا گھوٹالہ ہے ۔ مودی کو عوام کے مسائل پر جواب دینا چاہیے ۔

ای وی ایم کے سوال پر راہل گاندھی نے کہا کہ وہ مسئلہ اپنی جگہ ہے، مشین میں لگی چپ کو مینوپلیٹ کیا جا سکتا ہے اس لئے جیسے پوری دنیا بیلٹ سے ووٹ کرانےکی بات کر رہی ہے اس پر غور کرنا پڑے گا کیونکہ اس میں دھاندلی کے امکانات نہ کے برابر ہیں ۔

کانگریس صدر نے ایک سوال کے جواب میں کہا کہ قرض معافی کا عمل فورا ً شروع ہو جائے گا ، لیکن قرض معافی ایک تعاون ہے حل نہیں ہے اور یہ حل مشکل ہو گا لیکن ہم عوام کے ساتھ اس حل کو نکالیں گے۔ راہل گاندھی نے اس موقع پر جہاں سب کا شکریہ ادا کیا ، وہیں انہوں نے بی جے پی کی سابقہ ریاستی حکومتوں کے ذریعہ عوام کے لئے کام کرنے کے لئے ان کا بھی شکریہ ادا کیا ۔ انہوں نے تلنگانہ اور میزورم میں جیتنے والی پارٹیوں کو بھی مبارک باد دی۔