اسلام تشدد نہیں رحمت اور امن کی بات کرتا ہے/مولانا عبداللہ مغیثی مدرسہ اسلامیہ عربیہ دارالقرآن کے زیر اہتمام منعقد امن عالم کانفرنس سے صدر آل انڈیا ملی کونسل کا خطاب

اسٹاف رپورٹر( آمنا سامنا میڈیا )
سہارنپور// آج پوری انسانیت کو امن وآشتی کی ضرورت ہے ۔ ہمارے بزرگوں اور اکابرین نے ہمیشہ سے اسلام کے اسی پیغام کو عام کیا ہے۔ ذمہ داران قوم کو ہر میدان میں مثبت طور پر سرگرم عمل رہکر اسلام کے پیغام امن کو عام کرنا چاہئے تاکہ ملک وملت اور انسانیت پر اچھے نتائج برآمد ہو سکیں. ان خیالات کا اظہار آل انڈیا ملی کونسل کے قومی صدر اور آنڈیا مسلم پرسنل لاء بورڈ کے رکن مولانا حکیم عبداللہ مغیثی نے کیا. سہارنپور سے متصل موضع ٹوڈرپور پوسٹ ناہرپور میں واقع مدرسہ اسلامیہ عربیہ دارالقرآن کے زیر اہتمام امن عالم کانفرنس کا انعقاد عمل میں آیا. صوفی معین الدین کی زیر سرپرستی منعقد کانفرنس کی صدارت مولانا عبداللہ مغیثی نے فرمائی جبکہ مہمان خصوصی کے طور پر پیر جی حافظ حسین احمد, الحاج عتیق احمد خانقاہ رائیپور, ڈاکٹر پرکاش مہرا, کرمجیت سنگھ وغیرہ موجود رہے. صدارتی خطاب کرتے ہوئے مولانا حکیم عبداللہ مغیثی نے کہا کہ اسلام کے معنی امن وسلامتی کے ہیں یہی پیغام تمام مسلمانوں کو بحیثیت خیرامت عام کرنا فرض ہے۔ مسلمان باہمی اخوت وبھائی چارہ اور قومی یکجہتی کے علبردار ہیں۔ ہمارے اکابرین نے ملک کی آزادی سے لیکر آج تک تعمیر وترقی میں اپنا کردار نبھایا اور یہ ملک بھی اسی وقت ترقی کی. منزلوں کو حاصل کر سکتا ہے جب یہاں بسنے والے ہندو ،مسلم، سکھ ،عیسائی اور دیگر قومیں متحد ہوں گی. انھوں نے کہا کہ ہر وہ کام جس سے نفرت کو ہوا ملے، دہشت گردی کو شہ ملے، اسلام اس کے خلاف ہے. مولانا عبداللہ مغیثی نے کانفرنس میں موجود لوگوں سے شراب نوشی اور تمام طرح کی انسانیت کے لیے نقصاندہ چیزوں سے بچنے کی تلقین ، وطن سے محبت اور اس پر مرمٹنے کی عملی وقولی ترغیب وتعلیم کی ترغیب دلاتے ہوئے کہا کہ ہم کسی بھی قیمت پر بے راہ روی ،لسانی ،علاقائی اور عنصری عصبیات، جنسی تشدد، عریانیت و فحاشی اور بے حیائی و بے شرمی ، جمہوری اقدار کی پامالی ، عورتوں کی اہانت ، لڑکی ہونے کی وجہ سے شکم مادر میں جنین کشی، شراب نوشی ، منشیات کی کثرت اور آلودگی کا پھیلائو جیسی برائیوں کووقو ع پذیرنہیں ہونے دیں گے۔ انہوں نے کہا کہ اسلام دین رحمت ہے، یہ تشدد کا دین نہیں ہے ۔ اسلام اپنے اخلاق وکردار سے پھیلا ہے۔ وہ انسانی جان و مال اور عزت وآبرو کا محافظ ہی نہیں ہے بلکہ وہ چرند و پرند کے حقوق کا بھی نگہبان ہے۔ مولانا عبداللہ مغیثی نے کہا کہ ان دنوں ہمارا ملک بڑے مشکل دور سے گزر رہا ہے ۔ بعض طاقتیں دوسروں کو محروم کرنا چاہتی ہیں، لیکن ان کو معلوم نہیں کہ یہ آزمائشیں ہمیں مزید آگے بڑھنے کا حوصلہ بخشتی ہیں ۔ انہوں نے امن عالم کانفرنس کے انعقاد پر کنوینر قاری مصطفیٰ کو دلی مبارکباد پیش کی۔ پیرجی حافظ حسین احمد نے اللہ سے دعا کی کہ ہندوستان کو امن کا گہوارہ بنائے۔ اور تمام شہریوں کی حفاظت فرمائے. اس موقعہ پر دارالعلوم دیوبند کے استاد مولانا توقیر, مولانا ڈاکٹر عبدالمالک مغیثی ضلع صدر آل انڈیا ملی کونسل سہارنپور, قاری الیاس پیپلی مزرعہ, قاری جنید, قاری ذیشان, قاری الیاس پاؤنٹی, مولانا عارف, قاری جابر, قاری طالب وغیرہ موجود رہے. قاری مصطفیٰ کنوینر کانفرنس نے آنے والے تمام مہمانان کرام کا شکریہ ادا کیا.